Wednesday, October 10, 2007

عاد، والعود ...... "أحمد" الربعي

دغدغة مشاعر المواطنين بمواضيع مثل زيادة الرواتب/إسقاط القروض/ المنحة هي أمور تعودنا عليها في السنوات الأخيرة من نواب كل همهم الأصوات الانتخابية وفوزهم بالمقاعد النيابية، بدون أدنى شعور بالمسئولية تجاه هذا البلد، وأنا شخصيا لدي اقتناع شبه تام بأن ما يخصم من راتبي لصالح التأمينات الاجتماعية سوف أقبضه "من دبش" بإذن الله، وإلا ما معنى اتباع سياسة الهدر هذه في كل فائض مالي قد يأتي للدولة، وعوضا عن استخدامه في مشاريع تنموية، توزيعه "على اللي يسوى واللي ما يسوى" لتبديده على كماليات تافهة. سألني "أحد الأصدقاء" مرة عن كيفية صرف مبلغ محترم جدا جدا من المال أكون قد فزت به مثلا من أحد البنوك أو ورث طلعلي من أحد أعمامي في البرازيل "لوول"؟ وعما سأفعل بهذا المبلغ؟ سفرة؟ سيارة؟ سوق؟
وأنا المعروفة بعشقي الشديد للتسوق بكل أنواعه "حتى الجمعية"، لكني فجأة وبدون تفكير قلت: أشتري بيت أأمن فيه على الأقل مستقبل الأولاد. ولكن .... هذا حلم أعتقد أنه بعيد المنال .. على الأقل في الفترة الحالية
الوضع غير سار في بلدنا الحبيب، والأمور من سيء إلى أسوأ، والجماعة ولا همهم، المهم فقط من سيأخذ النصيب الأكبر من الكعكة، والمشكلة الحقيقة هي مهاودة الحكومة للنواب فيما فعلوا، ويفعلون وسيفعلون .. والسؤال هنا: ليش؟؟؟؟؟؟
شنو ماسكين على الحكومة عشان تقعد تساومهم وتقايضهم .. وعطني هذا مقابل هذا
___
ختاما
أي زيادة في الرواتب/ منحة/ إسقاط قروض .. نتائجها ستكون وخيمة من حيث ارتفاع الأسعار والمعيشة، وتدني مستوى الخدمات ... بالعربي .. بيفتقرون وطبعا بيطلعونها من جبودنا
الله يستر
.

22 comments:

ARTFUL said...

والله انا معاج يا عاليه
يعني الناس يبون يطيحون القروض واذا سألته ليش؟
قالك احنا أولا ، فلوسنا قاعد اتوزع بره على اللي يسوى واللي ما يسوى واحنا حاكتنا القروض؟

انا أقوله صح الحكومه غلطانه ، احنا أولى من غيرنا بفلوسنا ، بس مو جذي ، يعني الفائض المفروض نبني لنا فيه مستشفيات سنعه نعدل الشوارع نعدل فيه النظام التعليمي من مخوخ المدرسين لي ترميم كل المدارس وتسنيعها واعطائها كل وسائل التعليم الحديثه ، عمل بنيه تحتيه جديده وحديثة للمناطق الخارجية الجديده بحيث يسهل على المواطن السكن في تكل المناطق ونسوي قطار ((دبي مو أحسن منا)) علشان اللي يشتغلون بالديره يسهل عليهم التنقل

عمل مشاريع تفيد الدوله من الناحية الاقتصادية انفاقها على البحث العلمي بشكل صحيح والاستفاده من هالبحوث ونطلع لنا مصدر رزق ثاني غير النفط وخذ من هالسوالف الزينه

من غير بوق من غير تمصلح ، حلم جميل صعب تحقيقه ، اذا لم نجد رجال يحاتون ديرتهم

تحياتي لج خيتو

=)

ARTFUL said...

وعلى قولة ام سعيد رفيجة ام خماس

ياللللله بالستر

=D

جنة الحواس said...

I definitely agree with u and Dr.A7mad ..

هذا كان موضوع آخر زوارة

والله انه حتى جدتي اللي تعليمها ما يتجاوز الإبتدائي تفهم أكثر منهم و تعارض فكرة المنحة أو زيادة الرواتب
تقول خل يقطون الفايض على المستشفيات و المدراس و أي شي يفيد العالم ... أبرك

::

الإنفاق الإستهلاكي ما وراه إلا التضخم
ليش مو راضين يفهمون أو يتغيبون ؟

Mohammad Al-Yousifi said...

معك

Hanan said...

آنا بعد موافقة على هذا الكلام.
بس اشرايك بدل البيت تشترين شاليه؟

بوصالح said...

عالية

للأسف المطالبين .. يرون أن البنوك و النظام المالي للدولة سبب في مشكلة الإقتراض

قبل فترة سلطنا الضوء عليهم .. و كيف يعاملون قضيتهم و كيف هم لا يحترمون حتى علم الكويت

عالية .. قرض سفر .. و قرض سيارة .. و قرض تجهيز .. و الله يستر على المخفي

للأسف الإستهتار في التقدم للقروض و الأسباب التي تمم أخذ القرض على أساسها و هي الكماليات .. و ليس الإستثمار و التطوير

عالية ... المشكلة بالفكر و النهج و العقلية

عسى الله يشفيهم

فتى الجبل said...

اي والله نورت

KuwaitVoice said...
This comment has been removed by the author.
KuwaitVoice said...

مو أحمد الربعي كان أحد الأعضاء اللي وافقوا على قانون منع الإختلاط ؟

مممممممممممم


المشكلة أن بسرعة ننسى

يالله ماعليه :)

Shurouq said...

KuwaitVoice
بس أحمد الربعي ما كان من أعضاء المجلس اللي وافقوا على منع
الاختلاط
الربعي كان الوزير اللي نفذ قرار مجلس الأمة القاضي بالمنع

انت اللي بسرعة تنسى
:P


الله يسامحه ويخليه ويطول لنا بعمره
:)

KuwaitVoice said...

لا ما انسى ..

وانا أكتب تعليقي السابق ولما وصلت إلى

يالله ماعليه :)

تذكرت أن كان وزير ..

بس قلت ماني مغيرها .. وزير عضو مواطن اللي أهو .. يكفي أن وافق واهو كان يقدر ما يوافق

شخص يوافق على هالقانون الهمجي يفقد مصداقيته حتى لو كان والدي ..

لا فرق بين الصقر عندما وافق على قانون عمل المرأه والربعي عندما وافق على قانون منع الإختلاط ..

زعلتوا عالصقر والربعي اتبررون له :)

مافي فرق بين ربعنا والإسلاميين .. الفرق الوحيد يمكن ان اهم مكتسحين مقاعد المجلس والمجتمع .. أما احنا على كثر ما انجامل على كثر ما الله خافس فينا :)

الله يطول بعمر الجميع

White Wings said...

كل عام وانت بخير أولاً
وصحيح نورت القبس اليوم
وطرارة نواب المجلس تعدت حدود تعودنا عليها، بس فشلونا والله
خلينا في المهم، تروحين بي سي بي جي الراية والا دو بيش مود في لبنان، كيفج، فيني سوق
:)

Alia said...

artful,

حلم جميل صعب تحقيقه .. نعم للأسف
أما عن مسألة إن أحنا أولى بفلوسنا
قد اعترض على ذلك .. المسألة مسألة مصالح دول وسياسة .. شي أكبر من مجرد تبرعات

broke,

ومنو قال انهم مو فاهمين
قاعد يستعبطون بس
من وجهة نظرهم .. الديرة رايحة رايحة
ليش ما نهبش اللي نقدر عليه الحين؟؟

kila ma6goog,

مظلة العمل الكويتي يعني؟

hanan,

شاليه؟؟؟ لا أنا علي الطراد
الشاليه عليج إنتي

بو صالح,

صحيح ... ما نقدر ننكر دور البنوك، والبنك المركزي بالذات (بزيادة فوائد القروض) في المساهمة في الكارثة التي ستظهر عواقبها في السنوات القليلة القادمة .. ولكن
مثل ما قلت محد طقهم على إيدهم وقاللهم اخذوا قروض واشتروا سيارات كشخة وهدوم ووو

ومو باين لها شفا

فتى الجبل,

قول حق كويت فويس .. ذبحنا

kuwaitvoice,

شغيغي العزيز
مو إحنا اللي ننسى
والربعي مو بس منور القبس .. إلا منور الديرة بكبرها
سمعتني .. يعني الكويت بدون الربعي ... ظلمة
;)

shurouq,

يا رب

kuwaitvoice 2,

الفرق شاسع مثل ما قلت لك
والله يخلليك لا تقارن الربعي بالإسلاميين
آنا أسمي هذا كفر .. ولو إنني ادري ما يهمك ;)

وإي زعلنا على الصقر
والحين بنزعل منك
خلك خوش ولد .. ترى ما أعطيك عيدية

Soud said...

كلام جميل

AuThoress said...

ما "ينغرف" من مرتّباتنا شهرياً لأجل التأمينات، احسه في خبر كــــان


ذاك اليوم، دار حوار بيني وبين شروق، انها قلقة على مستقبل اولادك يا عالية، قلت لها ، وانا قلقة على "شيخوختي" اللي احتاج ان بلدي توفر لي في حينها كل اشكال الرعاية

الاوضاع صعبة، وترى أبي فلوسي من التأمينات وكيفهم

KuwaitVoice said...

خلاص مو بس منو الديرة بكبرها الا منور الدنيا والكون وجميع كواكب مجرة درب التبانه ..

قمع نسائي لحرية الرأي والتعبير :P

Alia said...

white wings,

me sorry
إسمج سقط سهوا
شوفي إذا بنتسوق في الراية مثل ما اتفقنا الحساب عليج
في لبنان علي مو مشكلة .. بس للأسف ما أقدر أسافر الحين ... شوفي عاد متى تفرج
;)

soud,

جميل جمال .. مالوش مثال
وعيدك مبارك

authoress,

وآنا بعد "وكيفهم" .. أبي فلوسي وعلى داير المليم

kuwaitvoice,

إي .. عاجبك وإلا لأ
قول لأ بعد!!

KuwaitVoice said...

لأ بعد

اجار الدين كشمش said...

الحمدالله على سلامه الريعي

بس حبيت ازيد على شروق

ان الربعي هو الي عين الدتوره

رشا وكيله بالتعليم العالي

وهي كااارثة الجامعات
الغبر معتمده كا جامعة سوفيك
وغيرها كثير

الله يشفيه .. لا بد للانسان

الذي يعمل ان يخطا ؟؟؟

فمالله

Mamloo7a Q8ia said...

تقبل الله طاعتج
وعيدج مبارك

Alia said...

kuwaitvoice,

أفااااااااااااااااااااا

أجارالدين كشمش,

الدكتورة رشا بعد صارت كخة
الله كريم

مملوحة,

أيامج سعيدة يا أحلى مملوحة
ترى والله مشتاقة لكم
أحلف على المصحف يعني
;****

اجار الدين كشمش said...

انا لما كتبت عن

د.رشا معتقدا انك

متابعه للاسباب الي ازاحتها

من جامعة الكويت

وقعدت في البيت

"""""""""""
اما كلمتك انها كخه
فهي كلمه تمس شخصيتها
وانا لم امس شخصيتها

انا قلت انها كارثة التعليم
الجامعي لانها مدرسه فقط
في الجامعه وليش اداريه في وزارة
التعليم العالي