Wednesday, November 16, 2005

طبيب الأسنان

اليوم وديت عمر "ولدي" طبيب الأسنان وقالولي لازم يشيلون ضرسه، طبعا آنا عندي رعب من طبيب الأسنان، يعني وآنا ماشيه بالممر في المستوصف وشميت ريحة غرفة الأسنان ما ادري شنو يصير فيني .. بطني يعورني وأختبص .. ما أدري ليش هذا الرعب .. فلما قالولي بيشلعون ضرسه آنا اخترعت اكثر منه، حبيبي اهوه ما كان خايف .. المهم قعد على الكرسي وأخذ الإبرة بدون آي ولا شي بس آنا كنت قاعدة في آخر الغرفة ومسكرة عيوني وأذوني عشان ما أشوف ولا أسمع إذا بكى او شي .. بس طبعا شوية دلع لازم.

الحين أنا بعد لازم أروح طبيب الأسنان ، يمكن صار لي سنين مو زايرته .. يعني الله يستر.. بس ما أدري متى راح تييلي الشجاعة وأقدر أروح؟

يمكن بعد 3 سنين شذي

يمكن