Monday, September 17, 2007

أكشن

تحديث
عنوان اللقطة: يهال آخر زمن
.
في حديث تلفوني بيني وبين مدرسة عمر - حيث تعذر مقابلتها - دار الحوار التالي بالمختصر طبعا
آنا: صباح الخير
الأبلة: صباح النور
آنا: هل صحيح إنج قلتي للطلبة كيت وكيت وكيت وكيت
الأبلة: والله الصراحة اللي أثار هالموضوع هو أحد الطلبة في الصف، وآنا حاولت قدر الإمكان صرف انتباههم عنه، وغيرت الموضوع، لأن كل الطلبة استنفروا لما سمعوا الكلام هذا
آنا: آها ... يعطيج العافية
.
أشوه الموضوع طلع مو مثل ما كنت متوقعة .. والمدرسة طلعت آدمية وفاهمة
بس شهاليهال اللي عمرهم 8 سنين ويتكلمون من الحين عن الموت وانهم لما ينامون كأنهم ماتوا، وان الله ياخذ روحهم ما ادري قلبهم
بس ما أقول إلا الشرهه على أهاليهم
.
عنوان اللقطة: أم متوهقة
.
عمر: عالية، أبلة "الريليجن" تقول إننا لما ننام الله يشيل قلبنا ويرد يحطه لما نقوم ... صج؟؟؟!!!؟؟
آنا (وجميع العلامات من تعجب واستفهام واستعباط واستغراب مرتسمة على وجهي): الابلة قالت شذي؟
عمر (وبإصرار على السؤال): أي ... بس صج؟؟
آنا (ودها تسب .. بس عيب): ماما إهية بس تبي تقوللكم أنكم لما تنامون .. تنامون بعمق وما تحسون بشيء
عمر: آها
.
الموضوع يحتمل أكثر من تصرف
.
واحد: أروح أكلم الأبلة واشرح لها ان طفل بثانية ابتدائي ما يقولون له هالكلام .. حيث أن أي كلام "آخر" قد يفتح علي أبواب جهنم
أثنين: أكشت .. وأطوف ولا كأنه شي صار
ثلاثة: أنطر شوي .. وإذا يا قاللي سالفة ثانية (من هالنوع) أروح وأكلمها
أربعة: أروح المدرسة .. وأكلم الناظرة وأتفاهم معاها .. ولو إن هالشي ممكن يخلي المدرسة تحط على عمر
________________

عنوان اللقطة: حبيب ماما
.
بيدو: مامي، بابا ما يستحي
آنا(تهيألي إني ما سمعته عدل): شنو؟
بيدو: بابا ما يستحي
آنا (ميتة من الضحك): ليش بابا ما يستحي؟
بيدو: عشان يحب الناس
.
ملاحظة: أبو بيدو كان قاعد مع رفيجه يطالعون تلفزيون
______________


أغنية .. غير ذات صلة بالموضوع

26 comments:

Shurouq said...

وتقولون ليش الهجرة؟
لا تطوفين.. روحي المدرسة


بيدو أثار شكوكي!

Hanan said...

Noooo. You have to go talk to her.
لا تسكتين لها

اللي يطالع التلفزيون مع رفيجه يعني ما يستحي؟ والله بيدو أفدتنا أفادك الله

nEo said...

نطري و اذا تكرر هذا الشي روحي المدرسة


بس ما ادري ليش الابلة قالتله جذي

White Wings said...

عالية
كلميها بالتلفون عشان تقدرين تسوين حركات في وجهك دون أن تراك هي
:)
أنا شخصياً منتظرة بكريي يتخرج ويترك المدرسة عشان أروح "أكفخ" مدرس التربية الاسلامية...اي...متحلفة فيه وراح أيمع ربعي البنات ونروح نطقه
الا ما استفسرتي من بيدو أكثر ليش اذا الواحد يحب الناس يصير ما يستحي؟؟
:)

حمودي said...

ماقالت له الابلة نام على جنبك اليمين واتفل على الجنب الايسر من السرير ؟؟

ARTFUL said...

اللقطه الاولى
فهمناها ، ورايي روحي المدرسة وانتي مسلحه بشكل كامل (كعب ، أظافر ...) كلمي أبلته شوفي شسالفه ، اذا الابله طولت السالفه على طول تلي الكعب وعلى راسها

;p

الحين صج ، أفضل تكلمينها واذا حسيتي انها اغلطت نصحيها نصيحه صغيرونه من نصايحج الطيبه

-----------------
اللقطه الثانيه
ما فهمت شااااااااااااااااااااااي

؟؟؟!!!!!!!!!!؟؟؟؟؟؟؟؟!!!!

يا انا فيني شي يا انتي الصيام مأثر عليج

:)

kila ma6goog said...

أصوّت للاقتراح الثالث

Najmah said...

كلميها بالهدوء وان شاء الله ماتتكرر

اللقطة الثانية حتى انا مافهمت شي

=)

KuwaitVoice said...

بيدو صديقي بالخمس دوائر .. يحليله شكله مو نحيس :)


أنا أقول لا تكلمينها ولا شي .. هالأمور راح تتكرر وايد بمشوارهم الدراسي .. بس كل اللي عليج إنج تأقلمينهم مع الوضع وتعدلين من مسار تفكيرهم لما يرجعون البيت


وهذا ولا شي من اللي بيشوفونه

ولاّدة said...

عالية
إذا تبين أكلمها آنا ترى ما عندي مانع
:)


white wings
إذا تخرّج ولدك الله يحفظه عطيني خبر أجي معاك..احنا نعين ونعاون في هالمسائل بالذات

Alia said...

shurouq,

محد قال ليش؟ بش الموضوع مو بهالسهولة
ومنو إللي أثار شكوكج بيدو وإلا أبو بيدو؟

hanan,

المشكلة مو إنني أكلمها أو لأ
المشكلة انها مؤمنة بالشي اللي قالته
وهذا معناته انها راح تغثني طول السنة

neo,

الطبلة اللي قالتله شذي موجود منها وايد بالمدارس
الله يستر على عيالنا

white wings,

لا فيس تو فيس أونس
وإذا تبين أحد يكفخ وياج .. آنا بالخدمة
ليش صديقات عيل؟؟

أما بيدو فكان قصده التالي
اهوه شخصيا وايد يستحي من الناس الغرب، ولما شاف ابوه قاعد مع رفيجه ويسولف ويضحك معاه - بتعبيره اهوه يحب الناس - .. قال اوه بابا عادي ما يستحي يسولف مع الناس الغرب
وصلت؟؟

حمودي,

والله مو بعيدة ... السنة الطويلة
وراح أبلغكم بىخر التطورات وفتاوى الأبلة الطبلة أول بأول

artful,

والله أنا ناوية أكلمها وأشوف شنو الموضوع، احتمال يمون فيه شوية مبالغة من عمر .. بس ما اعتقد انها راح تعترف انها غلطت
يعني اللي يفكر شذي ما ينفع معاه كلام المنطق

لا لا .. لا آنا ولا إنتي فينا شي
إقري ردي على وايت وينغز وبتفهمين

kila ma6goog,

إنت وايد مسالم
وآنا قلبي متروسة

najma,

أكيد راح أكلمها بهدوء
لا تخافون يا جماعة .. ترى آنا أليفة

أما اللقطة الثانية فأيضا إقري ردي على وايت وينغز

kuwaitvoice,

كلش ما توقعت رد الفعل هذا منك
خبري فيك ثوري

وبعدين لما ييي ويسألني صج وإلا مو صج
ما أقدر أطلع أبلته جذابة وأقول له لأ
الولد راح يضيع شذي
وفي النهاية آنا أبيه اهوه اللي يحدد شنو يبي .. وشنو يؤمن فيه
الأبلة الفاضلة مهمتها انها تدرسه ما جاء في الكتب .. وبس
اجتهادات وفتاوى ما أدري من وين مطلعتها .. ماله داعي

ولادة,

حبييتي والله
;)
شايلاكي لوقت عوزة

,

KuwaitVoice said...

شفتي شلون :) صرت مسالم


المشكلة مو بالفتاوي والإجتهادات .. هالمشكلة تهون ، كل سنة يختلف المدرس عن السنة اللي قبلها .. يعني ممكن السنة هذي المدرس مخه ضارب وتلقينه من جماعة التكفير والجهاد أو وحدة من جماعات السيارات المفخخه او على طريف شوي ويصير ارهابي او كلش كلش متعاطف معاهم .. اما السنة اللي بعدها تلقين المدرس عادي وهمه الأول والأخير أن يخلص المنهج ويفتك ..

لكن المشكلة الأكبر تلقينها بالكتب اللي قاعدين يدرسونها لعيالنا ..

وشي حلو أن اهو يختار الطريق اللي يبيه .. لكن هم التوجيه جدا ضروري .. خصوصا بظل الهجمه المتخلفه اللي اتواجه الدول العربية من التيارات الدينية اللي تلقينها بكل مكان اتبث أفكارها ..

DiLLi O MiLLi said...

أنا عندي نطري وأذا ياج مره ثانية وقالج أحد خُزعبلات مدرسات الدين اللي يفتون على كيفهم .. خذي معاج وايت ونغز بما أنها طويله فمفيده بهالحلات والمثل يقول : "الطويلة تقضي حاجتها .. والقصيرة تنادي يارتها"ههههه
:)


~: مبــــارك عليــك الشــــــهر :~


:**

ARTFUL said...

اوصلت

;D

y7laialh

esmh eibido?

Alia said...

kuwaitvoice,

إي والله صاج .. كتبنا مصايب

أما عن التوجيه
فالكلام سهل صدقني .. بس التطبيق شبه مستحيل

وترى ما حبيتك وانت مسالم

L'lee,

عاد آنا أحب هالمثل ودايما أقوله حق شروق .. هالمرة انقال لي
هذي نقمة الأقدار

artful,

اسمه بدر
بس اسم الدلع
بيدو

ARTFUL said...

الله يخليهم لج

بس ناديه باسمه او دلع بس خفيف مو بيدوو

يعني بدور بدير بدوري بدران

بوناصر

اللي اهو

علشان يطلع ريال مشورب يخررررررررع

;p

ARTFUL said...

اللللله ،، من صجج؟؟!!!

قبل الياهل على ويهه ما يفهم

الحين في شي ما يعرفه الياهل؟؟!!

الله يحفظ عيالنا ويتعلمون الشي الزين ويبعدون عن الشين

:)

شبكة الحوار الليبرالي said...

تتشرف شبكة الحوار الليبرالي, باستضافة النائب علي الراشد , ليتواصل مع الأعضاء ويجيب على تساؤلاتكم واستفساراتكم حول قانون الأحزاب الذي تقدم به النائب

نستقبل أسئلتكم على مدى اسبوع كامل ابتداءا من اليوم الخميس 20 - 9- 2007
وحتى تاريخ 1 - 10 - 2007

للأشتراك

www.secularkuwait.net

AuThoress said...

انا احب هالــ ملاكين الصغيرين، واحب امهم،واحترم ابوهم جدا
لأنه يحب امهم وايد :)

وانتهز الفرصة عشان اقول لشـــــروق، اني احبها وااايد بعد


و دمتم سالمين

White Wings said...

عالية - ولادة
حبيباتي ربعي البنات جاهزين حق الهواش
:)
والله من القهر يا بنات، عيل المدرس يقول للولد لا تقعد بين الشمس والظل لا يدخل فيك جني، والمرأة ليس لها حقوق سياسية، وأخيراً، الموضوع الصاعقة الي ولدي انصدم منه، الرجل يحق له يضرب مرته
ها، جهزتوا العجرات؟
:)

بـركـــــان said...

لله يكون بالعون .. سؤال جدلي افكر به و قاعد اجربه مع صغار افراد العائله البركانية الكريمه .. ليش كله نخرع الاطفال بالله سبحانه .. ترى الله يحطج بالنار ولا ولا ولا .. ليش ما نعلمهم يحبون الله اكثر مما يخافون منه .. يحبونه و لذلك يصلون و ما يكذبون و غيره و غيره .. مدري مجرد تفكير؟! قد اكون مخطأ

بركان ثائر

Alia said...

artful,

لا .. لا تخافين عليه
اهوه بروحه يقول .. آنا ريال

authoress,

يا بعد جبدي إنتي
والحب متبادل صديقتي العزيزة

white wings,

والله هذا يبيله زنوبة منقعة بماي ملح
عشان يعرف شلون الريال يحق له يطق مرته

بركان,

والله انت وبس الصح
عندنا الدين ارتبط بالترهيب
إفعل كذا وإلا العقاب سيكون كذا
بدل ما نعلم الاطفال الحب، نعلمهم الخوف وربما الكره

خبرنا عن نتائج تجربتك
يمكن تفيدنا بعد

ARTFUL said...

انا مع بركان

صح المفروض الياهل يعبد حب وتقرب لله مو خوف

انا احب الله لان اهو رازقني ومعطيني هالخير علشان جذي انا احبه واعبده واشكره
عاد مره سمعت من هالمشايخ يقولون الايمان درجات مادري حجيه صح والا غلط

بس يقول ان الايمان ومن أعلى مراتب الايمان عبادة الله حبا مو عبادته خوف

=)

sologa-bologa said...

أشوة في ناس تفهم

سوالف اليهال عن الموت
البركة في البرامج الدينية

Apathy said...

hathee it'hoon .. ana athaker bil mitwas6a kan fee dars bil tafa9eel 3an ya'jooj wa'mjooj .. ow ishlown il yananaw itha ra7aw jahanam shy9eer .. a7la mwathee3 tingal 7ag wa7d 3omra 12 .. kilish ma it9arwa3t

Anonymous said...

I just want you to know the picture of the two tykes made me smile :)